لوحة للفنان سمير رافع
سيبتلك حلمين تحت المخدة
و موسيقى تناسب واحدة منتصرة
على واحد مش مهزوم
وصورة يتيمة ف عيد الحب اللي مجاش
وبقايا جرح قديم
قبل ما تصحي
كنت بالملم ريحتي من ع الحيطة و م الدواليب
أسف جدا
مقدرتش أقشرها من على جسمك
أما الباقي انتي عارفاه
يعني البيت الواسع لما يضيق
واما لحافك يقصر في البرد
تيجي تغطي دماغك تبرد رجليكي
بقيتي في الأخر
وحيدة
محبوسة بين حبة حجارة
وشوية خشب
بتقسمي وحدك في موال الخرس
الورد يدبل تحت بابك كل عيد
ويشب مهما يشب
مايطولش الجرس
إبراهيم عبد الفتاح
