رحمة على روحى

فرّقوا الأشعار بِتاعتى رَحمَه عَلىٰ روحى فْـ مَماتى
وابنوا مِن أفكارى زِير
عَـ الطريق حطّوه سَبيل
يرتِوى مِنُّه اللى رايح واللى آتى
إحكوا للناس عَن صِفاتى
وانى كُنت بقَلب طَيّب
إيدى بِطّبطَب برَحمَه عَـ البِعِيد قَبل القُرَيّب
بَرسِم الضِّحكَه فْـ شجونى
بَجبُر الكَسر بطَبيعتى للى أصلاً كَسّرونى
إذكرونى
واذكروا الصّدَقات فِـ وِشّى
وانّى كُنت المأوىٰ دايماً للطيور تاكُل فْـ عِشّى
……………………………………

ضمير.. حى

مانيش أزّاى
ولو جايلى معاك تُهمه وناقصه دليل
هسأل مين وليه وازاى
ماليش فى النقل
ولو كان اللى قايل مين
هناقشك بالحِجج والعقل
مانيش هاسمع لقولنا وقال
ولو قولت ان ديكك باض
هقولك هات دليل فى الحال
مافيش عندى سَلَف صالح
لأن مافيش ولا مخلوق فى يوم ماعملش شئ طالح
مافيش كاملين
مافيش ناس أوصياء بالدين
ولو قولت ان جرح فلان هيشفىٰ بشمعتين وحجاب
هقولك أولى بيك تمسح جروحه بنقطتين بيتادين
مافيش كداب هيستغفر فيتحول من الصادقين
مافيش ظالم عشان صلّىٰ هتمحى صلاته ظلم الناس
مافيش فلاح زرع شطه وفى الآخر حصد أناناس
مافيش مخاليق شبه واحد
طبيعى يكون ما بينا فروق
عشان تحكم علىٰ أكله
لابد تدوق
يفيدنى بإيه بإن فلان واخوه علان داقوها زمان
فى بيتكم مُغرمين بالتين
فى بيتنا بيعشقوا الرمان
لذلك أيها الفانى
يا ريت من وقت للتانى
تكون فاكر بإن الناس سواسيه
وإن الدنيا بما فيها معديه
فعدى عليها بالإحسان
يا بخته اللى عاش إنسان ومات إنسان

……………………………………

الكلمة

فِـ حَضرِة سِتّنا الكِلمه مانيش قاضى
بَكون راضى بكِلمِة أخ أو أُستاذ
ولَو فَرضاً قالولى مَجاز لَقَب شاعِر
بَكون شاعِر بِمَوهِبتى
وبِرسالتى
بَلاقى جَواب لأسئِلتى فْـ عيون الناس
بَكون حَسّاس فِ حِواراتى
وبَنسىٰ وَظيفتى مَخلوعَه وَرا باب مَكتَبى المَقفول
ماببقاش غول بألقاب مِش لاقيلها دَلال
ومِش فارِق معايا تكون مُهَندِس أو كِبير عُمّال
وَلو شايِف بإن الحَرب ضافِت لِيك
مانيش هاتهَز لَمّا تقول بإنَّك كُنت مِـ الأبطال
ودَكتَرتَك ماهِش هاتضيف لرؤيتى لِيك
ولَو قاعِد عَلىٰ منَصّه ثقافتَك بَسّ هاتنَجّيك
فاخَلّينى أشوفَك فِكره ورساله
وسيب شُغلَك وألقابَك فى بيتَك وانتَ جاى لِينا
لأن المَجد مِش بِنفوذ ولا بِفلوس ولا بِدراع
فِـ مِحراب سِتّنا الكِلمه يكون المَجد للإبداع

اقرأ أيضًا : 

عزمي عبدالوهاب..حارس الفنار العجوز

منذر مصرى..شَيءٌ منكِ بقى على فمى

مصطفى على..أَحْتَاجُ إِلَى شَارِعٍ

نجاة على..بياض شعرك

وئام أبو شادى..شاعرة تحب كل يوم رجلا جديدا