الشيخ إمام وأبو النجوم وفردوس عبدالحميد.
الصورة من صفحة الفنان كمال خليفة
ويدق عودك
يدق عودك
تشهق الارض الشراقى
وتتبدر مواويل
وانا مين يغربل فرحتى/الوجع المناهض
يركن الناى على حيطة الروح بسمله
وقت اندهاش الثوره ع الكورنيش
وهى بتلم الخلايق
من غير فروق
الا فى الدم اللى طرطش وش البحر خوف
سلامات يابحر افرد ضلوعك للمدن
عدى فى وريدى لبر احلامك
السواقى دايره
تبكى جنب صورة
قلب خالى من تفاصيل الحياه
بس لسه العود عيساوى
لسه قادر ع الحكاوى وع الغناوى
لسه مطلوق فى الجناين
ع الميادين والكماين
خلى نور الفجر
دندن للقماين والمكن
والفلاحين
والتلامذه
اللى همزة وصل بينا فى الكفاح
يلا غنوا يارفاقه
ياللى كاتبين باالعرق فوق الياقه
مصر مش سوق للنخاسه
والنجاسه
مصر حضن الشقيانين
12 أغسطس, 2018
اللوحة للفنان بيكاسو
ضلى المواب
حن البكا لعيونى على سهوه
بس اللى فاكره
إن ايدها بين ايديا/روحى
لما تنسحب منى
رقصة فراشه
جنب شمعه تديلها الونس
ايدها فى ايديا
وطن
ثورة
وحريه
عدالة الله ع الغلابه
فى ارض بتشابى عليك
بين طعم اول بوسه
معجونه بشتا
وطعم حزن
مستبد وديكاتور
وكتابه تفضح خيالك
فى محطة الاتوبيس
اعدل لياقة قميصك
خلى اللى جواك
يفتكر لحظة وداع
مش هى دى
اللى كات بتاخدك لما تمشى
وتسيبك بدن
مش هى دى
اللى كات بتفرقك
ع القهوه والكورنيش
فدادين قلق
وحاجات ما يعرفهاش
غير اللى شاف
ضلك موارب
اكتوبر 2015
اللوحة للفنان فان جوخ
حفنة الصبر
جرة شفايفك
فوق قميصى بتعلن العصيان
وان كان فراقك
مسألة وقت
ورهان على قلبى
يقطع المسافات
انا مش مسامح
حفنة الصبر إللى سبتيها
لعيونى
-قعدت فجنب لوحدها
وسابتنى اناهد روحى على الرجوع ‐
بتلم ضيك
تزرعه /حواديت
كان واد وبنت
وقعده ع الكورنيش
ورصيد غنا
سجاده للعاشقين
توبه
تفرق الأوراد
على المساكين
حبة نوارس
يِسْكروا الناس
فى الشتا
وبراح بيفرش
فرحتك للصيف
وانا قلبى
كأس الجيلاتى
ابو معلقه فضى
فرهد
فرعشة عينيكى
وهى بتعدى
بين شط روحى
وشط احلامك
والبحر
يانص روحى
فص نور
بيخش قلبى
يفرز الأصحاب
ويهتف للبراح
والوقت ياخد لقمته
ويرحل
ويسيبنى
عالكورنيش
٢٠٢٠/٤/١٩
أقرا ايضًا :
حامد ندا في خمارة القط الأسود بصحبة الشعراء!
